Anulado Concerto de Celtas Cortos

Dende a directiva da AVV querémosvos dar unha mala noticia, o concerto estrela  que tiñamos pensado facer nas Festas de Novo Mesoiro para 2016 de Celtas Cortos, foi cancelado por problemas ca axenda do grupo e os prazos para fechar a súa contratación.

Ao se tratar dun grupo a nivel Estatal de gran repercusión tiñamos que ter fechado xa fai bastantes días a súa contratación,  pero vímonos na obriga de anulalo ao seguir esperando a confirmación por parte do Concello da elaboración das festas do noso barrio.

A principios de Maio deste ano presentamos a Concellería de Cultura un proxecto ambicioso, onde a AVV asumía unha importante partida orzamentaria a cambio de que o Concello nos permitira certo marxe para podernos financiar, pero debido o retraso de todo este proceso, onde a día de hoxe non temos nada concreto ( segundo o Concello o retraso ven dado por terse aprobado tan tarde os orzamentos municipais), fai varias semanas decidimos anular este concerto  e todo o proxecto presentado dado que non tiñamos noticias deles,  e nós, non podíamos asumir o risco que supón o  custe destas contratacións  sen ter o respaldo da Concellería de Cultura  e  sen saber as aportacións  que farían  as festas, asi como  o seu  permiso para buscarnos a financiación necesaria.

Sentimos moito esta noticia sobre todo pola expectativa creada no barrio e intentaremos fechar co Concello unhas festas  para o noso barrio que sexan acorde coa proposta presentada a Concellería de Cultura.

Cando teñamos algo realmente fechado e contratado anunciaremolo.