Convocatoria da Asemblea Xeral da Asociación

Hoxe mesmo, a Xunta Directiva vén de convocar a Asemblea Xeral Ordinaria e a Asemblea Xeral Extraordinaria da Asociación.

Deste xeito, todas as persoas socias fundadoras e titulares recibirán, a partir de mañá, por correo postal ordinario, a convocatoria para ambas. Porén, e para ir xa facilitando coñecer os contidos e os asuntos a tratar nas reunións, xa colgamos aquí ambas convocatorias, ás que están chamadas a participar todas as persoas socias da Asociación, independentemente da súa condición (persoa socia fundadora, persoa socia titular, persoa socia familiar ou persoa socia infantil), ao corrente de pago da cota a 31 de decembro de 2020:

A Coruña, 14 de setembro de 2021.

Prezada socia, prezado socio:

A través desta carta son convocadas Asemblea Xeral Ordinaria e Asemblea Xeral Extraordinaria da Asociación Veciñal de Novo Mesoiro, para o xoves 14 de outubro, nos espazos TEUS (rúa Ribeira Sacra, 17), a razón do seguinte desenvolvemento e das seguintes ordes do día:

Asemblea Xeral Ordinaria:

Día: xoves, 14 de outubro; Hora: 19.30 h, en primeira convocatoria; 20.00 h, en segunda convocatoria.

  • Orde do día:
    • Aprobación da/s acta/s da/s asemblea/s anterior/es pendentes.
    • Informe de Xestión.
    • Informe de Tesouraría.
    • Varios.

Asemblea Xeral Extraordinaria:

Día: xoves, 14 de outubro; Hora: seguidamente do remate da Asemblea Xeral Ordinaria.

  • Orde do día:
    • Punto único, elección de nova Xunta Directiva.

A respecto da Asemblea Xeral Ordinaria, o Informe de Xestión e o Informe de Tesouraría serán colgados nesta páxina web (puidéndose acceder aos mesmos premendo enriba de cada un) e nas nosas redes sociais (twitter e facebook) en tempo e forma para poder ser lidos previamente ao desenvolvemento da Asemblea.

A respecto da Asemblea Xeral Extraordinaria, a elección de nova Xunta Directiva rexerase polo establecido no CAPITULO IV (artigos do 38 ao 44 incluídos), dos Estatutos da Asociación (que se poden consultar premendo aquí). Neste sentido, todas as candidaturas que se presenten teñen de prazo para facelo até as 23.59 h do venres 24 de setembro, enviando un correo electrónico ao enderezo «presidencia[arroba]novomesoiro.gal» ou enviando por correo postal certificado ao enderezo “Despacho núm. 6, Centro Cívico Municipal de Novo Mesoiro, rúa Ancares, 15, C.P. 15190, A Coruña”, ao coidado da Asociación Veciñal Novo Mesoiro, a candidatura completa, con nomes e apelidos das persoas, e ordenada cos respectivos cargos asignados. As candidaturas deberán estar conformadas por, canto menos, sete (7) persoas (art. 20 dos estatutos) e poderán formar parte delas todas aquelas persoas socias fundadoras ou persoas socias titulares dadas de alta, ao corrente do pago das súas cotas a 31 de decembro de 2020 e/ou con máis de seis meses de antigüidade, segundo o recollido no CAPÍTULO II  (artigos do 8 ao 17 incluídos), dos estatutos da Asociación.

A respecto  do  pago da cota  do ano 2021, esta será domiciliada previa a celebración das asembleas sen que se produza suba algunha a respecto do último ano cobrado (2019), a razón das seguintes cantidades: persoa socia fundadora ou titular: 10,00 euros; persoa socia familiar: 3,00 euros; persoas socia infantil (menor de 18 anos): gratuíta. Esta domiciliación non condiciona a participación nas asembleas nas que poderán asistir, participar e votar (en función do disposto no artigo 11 e no artigo 17 dos Estatutos) todas as persoas socias ao corrente de pago a data de 31 de decembro de 2020.

Xunta Directiva da Asociación Veciñal de Novo Mesoiro.

Por unha Lei Galega da Saúde Mental

A Asociación Veciñal vén de iniciar unha colaboración coa Fundación Salma para a recollida de sinaturas de apoio, no noso barrio, a unha Iniciativa Lexislativa Popular por unha Lei Galega da Saúde Mental.

Na actualidade non existe na Galiza unha lei específica que recolla e salvagarda os dereitos das personas con problemas de saúde mental e que concrete con claridade as obligacións da Administración para garantir a atención sanitaria e a continuidade terapéutica. Isto implica que as persoas doentes, moitas veces, non teñan garantida unha atención acaída á súa doenza ou que, mesmo, o seu tratamento non teña uns protocolos establecidos ou sexan adecuados a unha temporalización axeitada para unha alta médica.

Pois a Fundación Salma vén de elaborar unha proposta articulada en forma de lei (que se pode ler integra premendo aquí) para que se debata no Parlamento galego e que inclúa todos estes dereitos e protocolos. Para isto elaborou esa ILP, ou Iniciativa Lexislativa Popular, que precisa dunha recollida de sinaturas, avalada pola Xunta Electoral, e que obriga ao Parlamento Galego a debatir a proposta. En total necesitan recoller 10.000 sinaturas en toda Galiza para que a súa proposta sexa debatida e, neste sentido, contactou connosco para que lle botemos unha man a recoller parte das sinaturas no noso barrio, cousa que imos realizar, como non podería ser doutro xeito.

A Asociación deixou as follas para poder asinar nas dúas farmacias que existen en Novo Mesoiro, tanto na farmacia Lage da rúa Ribeira Sacra, como na farmacia Nuria Alonso, da avenida de Novo Mesoiro, e até alí pódese achegar e lles botar unha man para que a súa proposta chegue ao Parlamento. Deste xeito, e durante os dous próximos meses, pódese preguntar polos pregos de sinaturas, xa que logo, ao ser unha iniciativa que ten un percorrido administrativo, ten que presentarse en tempo e forma, habendo un prazo, que para este caso remata en decembro.

Asinar esta ILP non implica que se estea de acordo co que nela se propón aprobar; asinar esta ILP significa que se apoia que se leve ao Parlamento galego para que en sede parlamentaria haxa o debate. Isto provocará que, unha vez que chegue ao Parlamento, os partidos políticos que alí están representados (PP, BNG e PSOE) se posicionen e se visualice se están polo labor de crear a lei ou de presentar emendas ou propostas para que, se procede, dea un encaixe mellor para o seu desenvolvemento dentro da estrutura do Sergas e do sistema de saúde galego. Por iso é importante botarlles unha man a recoller as sinaturas: porque estase a provocar un debate a respecto dunha situación que afecta a miles de persoas (a saúde mental) e que hoxe en día non ten cobertura no sistema sanitario.

Fotografía tomada nunha das farmacias colaboradoras onde poder asinar a iniciativa da Lei galega da Saúde Mental

Moitas grazas por asinar e colaborar con esta iniciativa da Fundación Salma.

#NovoMesoiroSolidario

O monte da Pena Loureira novo camiño das #RutasSaudábeis

Para este mércores 14 de xullo, nunha nova andaina das #RutasSaudábeis que realizamos conxuntamente coa Asociación Contra o Cancro da Coruña, eliximos o monte da Pena Loureira.

Deste xeito, e como facemos en todas as rutas, partindo ás 19.00 h do Centro Civico do noso barrio, realizaremos unha ruta que percorrera parte do polígono de Pocomaco e do polígono de Vío para subir todo este monte que nos ofrece vistas ao propio barrio de Novo Mesoiro, ao núcleo pobacional de Vío e á cidade da Coruña e ao concello veciño de Arteixo, nomeadamente aos núcleos de Vilarrodís e o Quinto Pino.

Xunsto antes de chegar ao polígono de Pocomaco, pasaremos ao carón da canalización do rego de Moitos, un dos regatos que conflúen no río Mesoiro, e que á súa vez forma parte da rede do río Monelos.

Xa no curuto do monte da Pena Loureira temos dúas alternativas: ben baixar ao carón da Canteira do Moucho, para logo tomar o camiño dos Romeiros a Pastoriza e volver cara o barrio polo monte da Pena Regacha ou atallar polo polígono de Vío pola rúa Basco Ibáñez, a través deste monte, por onde nace o propio rego de Moitos.

Se queres participar da ruta aínda estás a tempo de poder anotarte. Lembra, para facelo tes que chamar ao teléfono 900 100 036 ou ben escribir un correo electrónico a acoruna@aecc.es

#CoñeceNovoMesoiro #DescobreNovoMesoiro

Reunión coa Área de Deportes do Concello

Onte pola tarde mantivemos unha reunión coa Concellaría de Deportes do Concello da Coruña na que, ademais de técnicos da área, tamén participou a concelleira Mónica Martínez e o asesor da propia área Alfonso Hermida.

Os asuntos a tratar foron os recollidos no noso informe (que podes descargar do seguinte enlace https://t.co/kj9vOgEGW6 ) a respecto da situación do pavillón deportivo.

Imaxe exterior do pavillón de Novo Mesoiro

Nesta reunión, que a fixemos no mesmo pavillón do barrio, o persoal da concellaría explicou a iniciativa de modernización das instalacións deportivas que ten pensado desenvolver e que daría resolto as principais demandas que recollemos no noso documento. A esta altura é inconcebíbel que non haxa unha aplicación informática ou app móbil pola que podas ter acceso a ver as horas libres para poder facer reservas para o uso do pavillon, que este non teña acceso a internet ou liña telefónica ou mesmo, como demandaban as entidades federativas que empregan o noso pavillón, a posibilidade de ter algún sistema de retransmisión vía streaming ou tv en directo para poder emitir os partidos que disputan, nalgún caso de competición nacional ou estatal.

Do mesmo xeito, tamén, falamos das melloras necesarias no exterior do pavillón, como a necesidade de colocar un vao para deixar libre o acceso ao pavillón ou de despexar a saída de emerxencia posterior e que dá ao Centro de Saúde.Por último, desde Área aproveitaron para nos trasladar que en breve iniciarase unha pequena actuación no campo Johan Cruyff para reparar as zonas deterioradas do campo e que están en xestión coa propia Fundación para que esta inclúa nos seus orzamentos do ano que vén unha actuación máis profunda para a pista.

O mércores 30 nova andaina das #RutasSaudábeis

Este vindeiro mércores 30 realizaremos a terceira andaina que vimos desenvolvendo en colaboración coa Asociación Española Contra o Cancro da Coruña.

Despois das dúas primeiras experiencias estanse a consolidar os grupos que desenvolven esta actividade e que agardamos se vaian ampliando toda vez que avanza a vacinación contra a Covid-19 e imos superando a pademia.

Neste sentido lembramos que para participar nestas rutas aínda temos que nos seguir apuntando previamente chamando ao teléfono gratuíto 900 100 036 ou ben enviando un correo electrónico ao enderezo acoruna@aecc.es.

Vista do noso barrio desde a parte sur do monte do Castro de Elviña

Para este mércores escollerase un trazado «máis urbano» que percorrera os camiños tradicionais na contorna do Castro de Elviña aproveitando a súa cercanía ao noso barrio. Coma todas estas rutas partiremos do Centro Civico de Novo Mesoiro, ás 19.00 h, para baixar pola rúa do Convento e a rúa do Correlo até Feáns. Desde aí colleremos o camiño de Campos que vai paralelo ao rego de Campos (que se canaliza por baixo da estada da Deputación DP0512, á altura da Sampaio) para logo coller a desviación cara o camiño do Castro de Elviña que pasa por baixo da Terceira Rolda. E xa no monte do Castro de Elviña colleremos polo camiño das Penas da Agra para voltar polo vieiro para peóns e bicicletas que percorre paralelo ao pobo de Mesoiro.

Aínda estas a tempo de te anotar se queres participar deste percorrico que ofrece vistas moi chulas do noso barrio, da Coruña e do propio Castro de Elviña, ademais de percorres camiños que teñen séculos de historia.

Vémonos o mércores.

#CoñeceNovoMesoiro #DescobreNovoMesoiro

Nova andaina das #RutasSaudábeis que facemos coa Asociación Contra o Cancro

Onte pola tarde fixemos a segunda andaina das #RutasSaudábeis que estamos a realizar en colaboración coa AECC A Coruña.

Comezo da andaina no monte da Pena da Ragacha

Fixemos un camiñar que transcorreu polo monte da Pena da Regacha, o camiño dos romeiros a Pastoriza e o seu amilladoiro, pola contorna de Conxes e pasamos polos nacementos do rego de Moitos e o rego de Carneiros.

E aproveitamos, a unha semana, xa, da «noite máis curta do ano», para recoller 5 das 7 herbas de San Xoán, que crecen por toda esta contorna, para llas agasallar a todas as persoas que participaron.

Herbas de San Xoán que entregamos ás participantes da andaina

Nos nosos montes crecen o fento, a xesta, o fiúncho e a malva de xeito natural. O romeu plantouse na contorna do Centro Cívico (lugar de saída e chegada das rutas) como sebe ornamental e agromou alén da zona inicial.

As outras dúas herbas, a herba de San Xoán, rara vez témola por aquí; localizámola o ano pasado no monte da Pena Loureira, o monte ao carón de Vío, maís quedaba moi fora da ruta de hoxe para poder ir buscala. E a herba Luisa aínda nunca a vimos, polo que se a atopas algunha vez, se vas camiñar pola nosa contorna, avísanos para poder incluíla no noso rexistro da flora de Novo Mesoiro.

E lembra, se queres participar nas #RutasSaudábeis (a próxima será o vindeiro mércores 30 de xuño) podes apuntarte en:
Teléfono: 900 100 036. Email: acoruna@aecc.es

#CoñeceNovoMesoiro

#DescobreNovoMesoiro

Presentamos no Concello un informe a respecto das demandas sobre o Pavillón Deportivo do barrio

Este luns pasado, a través da sede electrónica do Concello da Coruña, presentamos un informe a respecto da situación do Pavillón Deportivo e que incluía demandas de mellora das propias instalacións, sobre os seus usos, mellora na xestión e facilidade para o emprego da veciñanza do barrio, ademais de solicitar, tamén, melloras na súa contorna, dirixíndoo á Concellaría de Cultura e á Concellaría de Barrios para que ambas tiveran coñecemento de primeira man.

A elaboración dese documento realizouse despois de recoller varias demandas da propia veciñanza durante os últimos anos e que foron trasladadas á concelleira de Comercio, Mercados e Barrios, Diana Sobral, nunha reunión que mantivemos con ela a finais do ano pasado. Tal e como explicamos no limiar do propio informe, logo daquela reunión, e como continuación da mesma, recibimos un correo electrónico da Concellaría na que se nos instaba a pasar por escrito as propostas que a Asociación entendía como necesarias para o Pavillón polo que procedemos a elaborar e enviar, ao coidado da Área de Deportes do Concello da Coruña ese escrito.

Posteriormente a aquel envío, seguimos recibindo suxestións a respecto destas instalacións do barrio. E chegamos a nos reunir coa actual directiva do Club de Balonmano Linea 21, o clube de balonmán do noso barrio, que nos achegou toda unha serie de cuestións a maiores das que xa tiñamos coñecemento, ampliando e completando as propostas e que conformaron o documento final a modo de informe.

Como con todos os documentos que elaboramos e presentamos, xa o colgamos na nosa nube para que poda ser descargado; premendo neste enlace podes miralo.

Nova ruta saudábel este vindeiro mércores 16

Despois da primeira ruta realizada en colaboración coa Asociación Española Contra o Cancro da Coruña o pasado 2 de xuño, este vindeiro mércores 16 realizaremos unha nova na que che convidamos participar. O punto de partida tomarémolo desde o aparcamento do Centro Cívico a partir das 19.00 h, e durante a hora e media seguinte iremos descubrindo espazos e sendeiros próximos ao noso barrio.

Esta rutas, a parte de ser unha actividade para adquirir hábitos saudábeis de vida, tamén queren servir para o coñecemento da preciosa contorna que temos en Novo Mesoiro, na se agochan catro regatos, un amilladoro, unha mámoa, o Castro de Elviña e flora e fauna singular, sobre todo nesta época do ano no que a primavera permite agromar a moitas especies.

Para poder participar da mesma simplemente tes chamar ao teléfono gratuíto 900 100 036 ou escribir un correo electrónico a acoruna@aecc.es.

Esta actividade é de balde e será realizada mantendo todas as medidas preventivas derivadas da situacion de pandemia da Covid-19, polo que as prazas son limitadas co obxecto de respectar as normas vixentes para actividades con persoas non convivintes.

Vémonos o mércores.